krisnakunj news
कारण गुलदस्त्यात, राजकीय वर्तुळात तर्क-वितर्कांना उधाण
भिलार प्रतिनिधी (टीम कृष्णकुंज न्यूज नेटवर्क)
Panchgani News पाचगणी नगरपरिषदेचे उपनगराध्यक्ष प्रकाश गोळे यांनी आपल्या पदाचा राजीनामा नगराध्यक्ष दिलीप बगाडे यांच्याकडे सादर केला असून तो स्वीकारण्यात आल्याची माहिती समोर आली आहे. या अनपेक्षित घडामोडीमुळे पाचगणीच्या राजकीय वर्तुळात चर्चांना उधाण आले असून, राजीनाम्यामागील कारणाबाबत विविध तर्क-वितर्क व्यक्त केले जात आहेत.
मिळालेल्या माहितीनुसार, प्रकाश गोळे यांनी कोणताही गाजावाजा न करता आपला राजीनामा नगराध्यक्षांकडे सुपूर्द केला. त्यानंतर नगराध्यक्षांनी तो स्वीकारल्याने उपनगराध्यक्षपद अधिकृतपणे रिक्त झाले आहे. मात्र, राजीनाम्यामागील कारणाबाबत अद्याप कोणतीही अधिकृत माहिती समोर आलेली नाही.
या राजीनाम्यानंतर नगरपरिषदेतील राजकीय घडामोडींना वेग आला असून विविध स्तरांवर चर्चांना उधाण आले आहे. काहींच्या मते हा निर्णय वैयक्तिक कारणांमुळे घेण्यात आला असावा, तर काहीजण यामागे राजकीय घडामोडींचा संबंध असू शकतो, अशी शक्यता व्यक्त करत आहेत. मात्र, याबाबत कोणतीही अधिकृत पुष्टी झालेली नाही.
सध्या पाचगणी नगरपरिषदेमार्फत विविध विकासकामे सुरू असून पर्यटननगरीच्या विकासासाठी महत्त्वाचे निर्णय घेतले जात आहेत. अशा वेळी उपनगराध्यक्षांचा राजीनामा राजकीयदृष्ट्या महत्त्वाचा मानला जात आहे. आता रिक्त झालेल्या पदावर कोणाची वर्णी लागणार, याकडे सर्वांचे लक्ष लागले आहे.
About the Author
